Коктейль 22.01.2025

Сінхронны фестываль салідарнасці і культуры – адразу ў чатырох польскіх гарадах!

Гэта ўжо восьмая акцыя культурнага руху BOSS. Ініцыятыва падтрымлівае беларускіх творцаў у эміграцыі і прыцягвае ўвагу міжнароднай супольнасці да сітуацыі ў Беларусі праз мяккую сілу мастацтва і творчасці.

26 студзеня ў Варшаве, Кракаве, Познані і Гданьску пройдзе фестываль Belarus Outside Sound System, які аб’яднае ўдзельнікаў вакол каштоўнасцей свабоды і салідарнасці праз музыку і мастацтва.

Хэдлайнерамі фэсту ў розных гарадах стануць беларускія праекты SOYUZ і Yegor Zabelov, SHUMA і Anastasia Rydlevskaya, WTBSK і Mustelide, Разбітае Сэрца Пацана і Pukst, а да яго арганізацыі далучацца шматлікія лакальныя супольнасці з арт-маркетамі, выставамі і майстар-класамі.

– На мінулыя фестывалі ў Варшаве і Вільні можна было трапіць за ахвяраванне на карысць беларускіх палітычных зняволеных, – распавядаюць лідары руху BOSS Аляксандар Багданаў і Сара Токіна. – Гэтым разам мы дапамагаем тым, хто абіраў свабоду і апынуўся ў эміграцыі, бяспечна сабрацца разам, падтрымаць і натхніць адно аднаго і адчуць сябе часткай адзінага сінхроннага дзвіжу, нават у розных гарадах.

Таму ўваход будзе вольны на ўсіх пляцоўках. Усе гэтыя гады мы назіраем, як тысячы беларусаў за межамі Радзімы працягваюць яднацца вакол сваёй музыкі і культуры агулам, бо гэта менавіта тое, чым мы ўсе сапраўды захапляемся і ганарымся.

Такім чынам кожная падзея, па словах арганізатараў, становіцца яшчэ і своеасаблівым шоў-кейсам актуальнай беларускай музыкі і мастацтва. Для шматлікіх творцаў у выгнанні гэта шанец павялічыць сваю аўдыторыю, сустрэцца з новымі слухачамі і гледачамі, наведаць гарады, дзе яны яшчэ не выступалі, і заставацца ў беларускім культурным асяроддзі.