Навумчык: Дзьве базавыя памылкі амэрыканскага дасьледчыка наконт Лукашэнкі

– Прачытаў інтэрвію Аляксея Знаткевіча з амэрыканскім дасьледчыкам Маркам Эпіскапасам «ЗША павінны адмовіцца ад зьмены рэжыму ў Беларусі» (сэнс прапаноў Эпіскапаса выказаны ў загалоўку, плюс — прывесьці «такіх людзей, як Ціханоўская, да нейкага дыялёгу з урадам у Менску»), – піша Навумчык. – Не ацэньваючы самі прапановы, дазволю сабе зьвярнуць увагу на дзьве базавыя памылкі шаноўнага Марка Эпіскапаса.

Ён кажа, што Лукашэнку вельмі зацікавіць «магчымасьць «аслабіць візавы рэжым паміж Беларусьсю і Эўропай. Мы можам садзейнічаць усім відам студэнцкіх паездак паміж Беларусьсю і Эўропай».

Ды ніяк гэта яго не зацікавіць. Лукашэнка арганічна не прымае Захад (сьведчу як чалавек, які ведае яго з 1990 года), і ня хоча ён для беларусаў ні аслабленьня візавага рэжыму, ні «студэнцкіх паездак». Наадварот — ён хоча максымальна ізаляваць Беларусь ад Захаду.

Гэтага ж жадае і Пуцін, і тут мы пераходзім да другой памылкі:

«Супрацоўніцтва (з Захадам) — гэта тое, на што Пуцін ня можа накласьці вэта. Бо як Пуцін скажа Лукашэнку ня весьці спраў з Эўропай, ня мець ніякіх гандлёвых стасункаў з Захадам? Ён сапраўды ня можа гэтага сказаць».

Неверагодная наіўнасьць!

Лукашэнка выканае загад ня тое што Пуціна — ён ускочыць на заднія лапкі па шчалчку, умоўна кажучы, апошняга чыноўніка з адміністрацыі расейскага прэзыдэнта (менавіта на такія загады ён і зьнішчае цяпер у Беларусі ўсё беларускае). Лукашэнка цалкам кантралюецца Крамлём і Лубянкай (зрэшты, гэта адно і тое ж).

ЗША ўпусьцілі момант у пачатку 1990-х, калі ня толькі Апазыцыя БНФ у ВС-12 ня мела ніякай рэальнай падтрымкі, але і Беларусь фактычна ня мела падтрымкі — насуперак дзесяткам мільярдам даляраў, якія Белы дом штогод увальваў у Расею, не жадаючы прызнаць, што яна захавала свой чэкісцкі імпэрскі характар.

Сёньня кардынальна зьмяніць сытуацыю ў Беларусі можна толькі адным спосабам — зьнішчыць Расейскую імпэрыю.